Meirone Massimo

La Madonin-a dla Ròca


di Guido Ferrero (1899-1978) Primo Presidente della Procavour nel 1956


Lassu sla Ròca, ancontra al bleu del ciel,
an  mes a le ruvin-e  del castel,

a j-è una Madonin-a bianca bianca
che i brass, per ambrassene, a n’ spalanca.

‘l sol a la matin a-j fa gran festa,
posandje ‘l sò diadema su la testa;

a la seira, peui, quand che ‘l sol an pianta,
j’ultim ragg a la ‘ndoro tuta quanta.

Se ‘l ciel a l’è seren e la neuit bon-a,
le stelle tute quante a j fan coron-a.

I vent a la caresso neuit e dì,
fasand a gara  a chi l’adŏra ‘d pì.

L’erba, a ij so pé a deposita d’istà
un tapis a color tut ricamà,

tut ricamà da ogni sort ed fior
ch’a van giogand a chi ch’a j fa pì onor.

E quand ch’a j ven l’invern la fiòca a j fa
un mantel come chila imacolà.

Tuti la onoro: ‘l sol, la luna, i vent,
mach coi ‘d Cavour son trop indifferent….

Una volta, quand che l’amor a j’era pì fort
per la Madòna e per i povri Mòrt,

le fomnette montavo su sla Ròca,
con el sol, con la pieuva e con la fiòca,

girand an fila ‘ntorn a col pilon,
a rosariavo con tanta divossion.

A l’era un’ usansa talment bela
che fin-a De Amicis veul contela

an col liber scrivù tanti ani fa,
“Alle porte d’Italia” intitolà.

Andoma, Cavoureis, lassù a trovela
la nòstra Madonin-a tanto bela,

tornoma pì soens fin-a sla sima
a dije quaic rosari come prima!

Guido Ferrero
“ragazzo del ‘99”

Condividi questa pagina su